إلى كل من يردي أن السفر لباريس

للي بيسافر باريس

أأبرز معالمها برج ايفيل واشهر شوراعها جادة الشانزلزيه واشهر
المقاهي فيها مقهى الفوكيه




شارع الشانزليزيه

يوجد في الشانزلزيه وهو ارقى وافخم الشوارع السياحيه بالعالم كله لانه
يوجد به افخر اوارقى المحلات والماركات العالميه والمطاعم الراقيه مثل
مطعم بيتزا بينو وكما يوجد فيه مقهى الكارديدور وكثرةفيها المقاهي
على جنبات الرصيف والطرقات

الحدائق

وفيه حديقة غابات بالونيا الشهيره والتي يوجد فيها بحيرة مفضله
للعشاق الرومانسيه والجو اللطيف وكذلك يمارس اغلب السكان فيها
رياضة المشي والجري في جنبات الحديقه ويمر بها نهر السين ولقد عدل
مجرى نهر السين بحيث يدخل في وسط العاصمه باريس ويشقها بالنصف تمام

مدينة الألعاب دزنى يوروب

وعلى بعد مسافة نصف ساعه على طريق السريع فرنسا المانيا يوجد مدينة
الالعاب الشهيره دزني يورب ( والت ديزين ) وفي المدينة دزني لاند يوجد
ستة او خمسة فنادق بمختلف المستويات والمطاعم وجميع الخدمات وكما
ان الالعاب فيها لكافة الاعمار كبار وصغار

المطاعم

هناك يوجد في باريس مطاعم عربيه تقدم الاطباق العربيه وهي مطاعم
راقيه جدآ مثل مطعم الديوان وهو يطل على نهر السين

يوجد في جنوب العاصمه الحي الاتيني وهو حي يسكن فيه العرب من
شمال افريقيا من المغرب والجزائر

اغلب السياح من العرب هم من الخليجين والذين يفضلون المشي طوال فترة
المساء في شارع الشانزلزيه متنقلين بين المقاهي الراقيه والمطاعم

وشارع او جادة الشانزلزيه تبدأ من تجمع عدة طرق او شوارع رئيسيه تلتقي
في دوار على بوابة قوس النصر ثم ينتهي بك الشارع الى دوار ميدان سله
اهراميه قديمه يكون فيها اغلب الاحيان او تقام عليها العروض الوطنيه والعسكريه

المشى والتجول

المشي على هذا الشارع هو المتعه الحقيقه حيث الرصيف الواسع والمحلات
الكبيره الراقيه والناس تزدحم فيه ليل ونهار
الطرق في باريس مرصوفه بالحجارة القديمه مما يعطي انطبعآ مميزآ وجذاب
عند السائح وكذلك جمال مبانيه وبيوتها القديمه واللتي يصل عمر بعضها الى
لثلاثة قرون او اربعه وكذلك يوجد مباني حديثه مميزة

فكرة عن الأسعار

بالنسبه للاسعارفهي غاليه جدآ وخصوصآ في منطقة الشانزلزيه حيث ان
فنجال القهوة يصل سعره الى حدود 12 دولار تقريبآ في مقهى الفوكية

فيها متحف اللوفر الشهير وبرج ايفيل والحدائق التي تحت البرج...

افضل الطرق للوصول الى مدينة ديزني للألعاب هي الاندر جراوند

الشانزليزيه بقوس النصر

ARC DE TRIOMPHE وارتفاعه ياصل الى 110 متر اذا طلعته

يعطيك بانورما على الشانزاليزيه ولا اروع منه


المحلات والأسواق

المحلات في هالشارع كثيره ومن اشهرها محل العطورات وادوات الزينة

سيفورا ..وهالمحل يعتبر اكبر محلات العطورات في باريس .. SEPHORA

ومن المحلات الكبيرة في هالشارع محل اسمه فناك

FNAC والمحل هذا جنب السيفورا وهو في قلب الشانز اليزيه والمحل هذا
مشهور بالادوات الالكترونيه من كمبيوترات وجوالات وافلام فيديو

والمحل هذا يبيع شرائح جوال مدفوعه .. سعر الشريحه حوالي 30 يورو ..
ويطلبون منك احضار جواز سفرك عشان يعطونك شريحه!!

وفيه محل ديزني لملابس والعاب الاطفال .. ولوي فيتون LOUIS

VUITTON وهذا من اغلى محلات الجلديات .. وتلقى اليابانيين صافين

سرا عليه .. وبصراحة بضايعه حلوه مره

.
وشارل جوردان للاحذيه والجاكيتات .. ومحل قاب للملابس.. والمحلات

كثيره لو اعددها كلها ماخلصت

بعض شركات السيارات الكبيره لها صالات عرض خياليه في الشانز اليزيه ..
ومنها معرض للمرسيدس موجود فيها موديلات خياليه .. ومعرض لتويوتا ..
ومعرض رينو اللي جلست اسعبل عند الموديلات اللي حاطينها .. لانها شي
مايخش المزاج .. سيارات غريبه من جد


سوبرماركت كبيره اسمها مونوبغي

Monoprix شعارهم .. كلش(ن) في الثلاجة!!!

المقاهي والمطاعم


طبعاً اشهر مقهى هو الفوكيت

Fouquets... مافيه احد راح فرنسا ولاجلس فيه ..وافلقوني
اذا فيه احد يدري انه مسمى نسبة الى مؤسسه لويس فوكيه ..

خيالي .. صاير في الزاويه بين الشانز اليزيه وشارع جورج الخامس ..

والفوكيت يقفل الساعة 2 في الليل .. وهو من المقاهي الغالية ..
سعر الكابتشينو فيه يوصل الى 8 او 9 يورو والمويه 10 يورو!!

ومن المقاهي المعروفه هناك قهوة باريس Cafe De Paris وهالقهوة اكثر
اللي يجونها اجانب وهي جنب الفوكيت ... ويجي بعدها قهوة لو
دوفيل Le Deville .. هالقهوة ماتسكر الا الساعة 2
في الليل .. تلقى غالبية
اللي جالسين فيها حاجزين طاولاتهم من بدري .. مع العلم
ان فيه قهاوي افضل منها بكثير .. بس هالعالم تعودوا ..

ويجي بعد الدوفيل ..تجي قهوة رينو Renault وهالمقهى راقي وهادئ في

نفس الوقت .. وصاير داخل معرض رينو للسيارات.. جنبها على طول

هاجن داز Häagen-Dazs سلملي على وهالمكان
معروف عند كثير من

الناس ببيع الايس كريم .. والجلسة في هالمكان تحلو في اخر العصر .. لدرجة انك
بتلقى عليه سرا ناس يبون يجلسون فيه .. وفي هالفترة يجي نفس ا

وفي الجهة المقابله من الهاجن داز تجي قهوة الماريوت Marriott وهالقهوة
في نظري انا من احلى القهاوي .. والسبب ان اللي يخدمون فيها نفسياتهم
حلوه غير اللي في القهاوي الثانية ..وهي تقفل الساعة 12 في الليل ...
وتجي بعدها بمسافه قهوة اسمها مدريجال Le Madrigal هذا احلى وقت لها اول العصر

المطاعم

بالنسبة للمطاعم عد واغلط .. منها الفوكيت اللي تكلمنا عنه قبل شوي يوجد
في داخله مطعم فخم لكن اكله بصراحه مهوب الى هناك ... وفيه بعد مطعم
ماسيون دي السياس MAISON D'ALSACE وهالمطعم من احلى المطاعم
اللي تقدم المأكولات البحرية وبصراحه كل ما مريت من عنده لقيته فاتح
مابعد شفته مقفل ابد بتلقى ناس كثير طالبين طبق مكون من ثلاثة ادوار
ماكولات بحريه اشكال والوان ولكن مشكلتها انها نيه .. يعني لاتغلط
وتطلبها والا بتبلش فيه مثل بعض الناس .. الله يديم النعمه .. الطعم رايح
... وفيه مطعم بيتزا بينو Pizza Pino وهو تقريباً اشهر
مطعم في الشانز اليزيه تلقى
مسنترين فيه من بعد الساعه 2 في الليل .. وقدامه مطعم بيتزا
روما Pizza Rome وتقريباً نفس الاكل اللي عند بيتزا بينو.. عموماً غالبية
المطاعم بالنسبة للمشروبات تلقاها ماتقدم الا اورنجينا والا كوكا كولا
او كوكا لايت .. لاتبلشهم عندكم ببسي والا ميرندا والا مدري ايش ...
في الجهة الثانية من الشارع يوجد مطعم بلانيت هوليوود Planet Holywood
والمطعم هذا ما اتوقع فيه احد مايعرفه .. لايفوتكم الفاهيتا عندهم تراه خطييييير ...

مطاعم الوجبات السريعه المشهوره في الشارع هم ماكدونالدز McDonald's
ومطعم كويك Quek .. هذولا اللي اتذكرهم .. الباقي ناسي اسماءها او
بالاصح مافيه امل اتذكرها


الفنادق

نجي للفنادق .. طبعاً مافيه احد مايعرف فندق الماريوت Marriott.. وهالفندق
صاير في قلب الشارع ولاعليه كلام ... جنبه شقق فندقيه اسمها كلاريدج
Claridge حلوه بس مشكلتها انها شوي قديمه .. لو سكنت فيها وصادف
ان الجو حار تقدر تطلب مكيف للغرفه .. لانها تجي بدون مكيفات .. ولهواة
الطبخ اطلبوا مواعين ولاتستحون .. خلوهم يجيبون المعاميل كلها وترا عندهم
زمزميات للقهوة والشاهي ... وهالثنين هم الوحيدين اللي في الشانز اليزيه ..
لكن فيه حولهم فنادق كثيره منها : كاليفورنيا ، كلاريدج بولمان ، تشاتو
فرونتناك ، ورويك ، وكونكورد لافاييت .. وهالاخير هو ابعدهم .. بينه وبين
الشانز من 10 دقايق الى ربع ساعه مشي ... وغيرها كثير

الصرافين

الصرافين الموجودين في هالشارع بتلقاهم منتشرين في كل جهه .. طبعاً
يبيلك تشوف من احسن واحد فيهم سعر .. هالكلام في حالة انك جاي للبلد
مامعك يورو .. وانا اشوف ان افضل اثنين هم اللي موجود المجمع التجاري اللي
فيه فناك FNAC والثاني في المجمع التجاري اللي فيه بلانيت هوليوود ..
والاخير يبيع بطاقات مكالمات دوليه ... وبالنسبة لبطاقات اعادة التعبئه للجوال
تلقاها عند فناك FNAC

شارع جورج الخامس او افنيو جورج اسانك Av. George V

وياتي في قلب هذا الشارع الفندق العالمي الشهير فندق جورج الخامس
Four Seasons Hotel George V واللي تعود ملكيته للامير الوليد بن طلال
وهو من اغلى الفنادق في باريس وافخمها ... وجنبه فندق برنس دو قول
Prince De Galles ... ويوجد في راس الشارع شقق الكاريدور وهي قريبه
مره من الفوكيت ...وقدامها محل يبيع ايس كريم خطييييييييييييير الظاهر ان
اسمه بارادايس paradise اذا ماني غلطان .. لايفوتكم الايس كريم عندهم ..مكتب
الخطوط السعوديه في نفس الشارع ورقمهم مميز وفي الشارع نفسه مطعم عربي
اسمه وبقاله عربيه اسمهم الديوان .. اذا حنيتوا للاكل العربي مهوب يخالف تجون
تاكلون فيه .. والمطعم صاير في الدور الثاني ويجي فيه غناء في الليل بس
احيانا يبيلك تحجز قبل تجي .. وترا مافيه خربطه يعني مناسب للعوائل..
ودير بالك على الفاتورة يدخلون فيها طلبات ماطلبتها ..
عشان كذا يبيلك تدقق في الفاتورة قبل تحاسبهم هذا ...

في الدور الارضي من المطعم فيه اكلات عربيه على السريع .. مثل شاورما
وفلافل وكبه وانت ماشي .. وفيه بقاله عربيه ...ومن المطاعم العربيه الثانيه
مطعم نورا .. ومكانه في خلف فندق جورج الخامس وله فروع ثانيه في باريس ...
وفي شارع جورج الخامس مطعم حلو وفخم اسمه فندي FINDI وعلى ما اعتقد
انه مايفتح الا في المساء ..في الشارع محل كبير لجورجيو ارماني ..
وبوتيك فريه FERRE وفيه محلين حلاقه في نفس الشارع ( رجالي ونسائي )
ممتازين بس غاليين .. حلاقة الذقن بس ب 40 يورو والشعر ب 60 يورو

يتفرع من شارع جورج الخامس شارع اسمه فرانسوا الاول rue Francois Ier
وعلى هالشارع مجموعه من الفنادق والمطاعم منها مطعم العجمي (فرع للي
عندنا في شارع الثلاثين ) .. وفيه شركة وبوتيك كارتييه Cartier ... وفيه
بعد بوتيك شوميه وزينيا وفرساتشي وغيرها كثير

في نهاية الشارع يجي شارع من العيار الثقيل اسمه افنيو مونتين
Avenue Montaigne وهالشارع عليه افخم المحلات في العالم مثل شانيل،
وهاري وينستون ، وروبرتو كافالي، ولوي فيتون ( بعض الناس يسمونه لويس فويتن ) وغيرها الكثير من المحلات الفخمة ... ويتربع في وسط الشارع فندق بلازا اثينيه
Plaza Athenee وهو من الفنادق الفخمة في باريس

وفيه شارع اسمه رو فوبور سان اونوريه Rue Faubourg St Honoré والشارع هذا يعادل الافنيو مونتين في الفخامة والمحلات اللي فيه تقريباً نفس المحلات في الافنيو مونتين الا انها اكثر هنا ... وفي نفس الشارع فندق بريستول Bristol وهذا اغلى فندق في باريس .. يعني اذا مريت من عنده ناظره وصد كنك ماشفت شي


الاسواق :

خبرتي في الاسواق مهيب الى هناك ... لكن اشهر سوق موجود في باريس هو القاليري لافاييت GALERIES LAFAYETTE
وهو في منطقة الاوبرا او باريس 9 على شارع بولفار اوسمان boulevard Haussmann .. ويتكون من سبعة او ثمانية ادوار..ويفتح من الساعة 9 ونص صباحاً الى 7 ونص مساءً .. السوق هذا في اي شي تبيه .. وبس!! هذا اللي اعرفه عن هالسوق

بعض الكلمات الفرنسية المتداولة

: (طبعاً بدل الراء بالغين والفاء بV )
صباح الخير : بونجور ، مساء الخير : بونسوار ، كيف حالك : كومون سافا
، بخير : تخغيبيان ، الى اللقاء : اوروفوار ، تصبح على خير : بون وي ،
انا اسمي بريق : والتبن قصدي جو مابيل بريق ، تتكلم فرنسي : باغليفو
فغانسي ، من فضلك : سيل فو بليه ، شكراً جزيلاً : ميغسي بوكو ،
حسناً : داكور ، نعم : وي ، لا : نو ، اعذرني : اكسيكيوزموا ، آسف :
باردون ، كيفكم : كومون اليفو ، 1 : اون ، 2 : دو ، 3 : تروا ، 4 : كاتر
، 5 : سانك ، 6 : سيس ، 7 : سيت ، 8 : ويت ، 9 : نوف (يازين هالرقم )
، 10 : ديس ، مبسوط بشوفتكم : انشانتيه دوفوفوار ، انا : موا ، انت :
توا ، هو : ايل ، الايام من السبت الى الى الجمعة : سامودي ، ديمانش ،
ليندي ، ماردي ، ميركودي ، جودي ، فانترودي .

المال

اللي يجي باريس وماخذ معه شيكات سياحيه .. عادة ماتكون توماس كوك
او امريكان اكسبريس ..مشكلة المحلات والمطاعم في باريس مايعترفون كثير
في الشيكات السياحية ..معنى هالكلام انك يبيلك تحولها الى كاش .. اذا
رحت للصرافين العاديين خذوا عليك عمولة ، وغالبيتهم ياخذون 3% ..لكن
تقدر تحولها بدون عموله من الشركة اللي ترجع لها شيكاتك.. بالنسبة
لتوماس كوك فروعها منتشره في كل مكان الشانز اليزيه لحاله فيه ثلاثة
فروع لهم !! ومنطقة الاوبرا اللي اعرفه فيها اثنين ... اما بالنسبة للامريكان
اكسبريس هذولا علل فروعهم قليله لكن فرعهم القريب موجود في منطقة
الاوبرا وبتلقى مركزهم كبير وواضح .. وصرافينهم موجودين في قبو المركز ..
بس لاتنسى تجيب جوازك اذا جيت تصرف !!! ترا لو تجيب اي اثبات ثاني
مايعترفون فيه .. لازم الجواز

التنقل في باريس

اما عن طريق المترو او التاكسي .. المترو اول شي تشوف
خط سيرك والمحطة اللي تبي تروحلها وبعدين تقص تذكره سعرها تقريباً
1ونص يورو وتوصلك للمكان اللي تبيه ... وانتبه ترمي التذكرة اذا دخلت ..
لان الشرطة احيانا تسوي حملات تفتيش على التذاكر واذا مالقوا التذكرة
دخلت في سين وجيم .. وانتبه من النشالين .. ترى اساليبهم كثيره ...
والتاكسي من 7 الصباح الى 7 المساء تختلف تسعيرته عن بعد الساعة 7
في المساء .. طبعاً في المساء تكون اغلى !!وممنوع انك توقفه من اي
مكان .. لازم تاخذه من عند موقف التكاسي وتلقى لوحه مكتوب عليها TAXI
اوقف تحتها وبيجيك التاكسي ..

مطاعم انصحك تزورها :


مطعم لو قراند كافيه Le Grand Cafe في منطقة الاوبرا ومن المطاعم
اللي تفتح 24 ساعه ،مختص بالماكولات البحريه واكلهم خياااااااااالي

مطعم هيبوبوتامو Hippopotamus مختص بالستيك والاكلات الامريكية ..
له فروع كثيره فيه واحد في شارع متفرع من الشانزاليزيه وفيه في
منطقة الاوبرا قدام القراند كافيه وغيره كثير


مطعم مكسيم Maxim's شارع Rue Royale من المطاعم الحامضه من ناحية
الاسعار بس ان فخامته تحكي يعني ماعليه كلام ابد .. يكفى ان


مطعم انتركوت .. فيه نوعين من مطاعم انتركوت في باريس واحد فخم
مره ولايفتح الا من بعد الساعة 6 المساء وبصراحة ما اتذكر اسم الشارع
بس اسميه شارع العصارات عشان مطاعمه كثيره .. وهو في شارع يتفرع
من فرانسوا الاول ... والنوع الثاني من مطاعم انتركوت هذا تلقاه في
كل محل .. ومشهور بطبق الانتركوت اللي هو شرايح ستيك وبطاطس مقلي
وصوص لونه اصفر وهو السر في هالطبخه والمطعم مايقدم الا هالطبق

واتمنى من المسافرين تسجيل جوازاتهم في السفارة اول ماياصلون
وترا راس مالها ترسلها على فاكس السفاره هناك وينتهي الموضوع ...
وبالنسبة للمساجد اللي يصلى فيها الجمعة تقدر تتصل على السفارة
وهم بيعلمونك عن اقرب مسجد لك

شكرا كل على المعلومات الجميلة جدا الله يعطيك العافية

شكرا على مرورك الجميل نورت

شكرا لكي على المعلومات الجميلة جدا الله يعطيك العافية

شكرا لكي على المعلومات الجميلة جدا الله يعطيك العافية